اليوم السبت الموافق 4/9/2010
بعد فترة غياب طويلة أوى عن الكتابة مش عارف ليه بطلت أكتب رغم أنى بحب الحكاية دي أوى
بس يمكن عشان مكنتش لاقي حاجه أكتبها
أو مكنتش حاسس حاجه أكتبها
ودلوقتي هعرض عليكم بعد التواريخ المهمة اللى فى حياتي فى الفترة اللى فاتت ومن تاريخ آخر مشاركة فى المدونة بتاعتي دي
واللى كانت قبل تسليم مشروع التخرج يعني سنة 2007
وأحنا دلوقتي فى 2010
نقلة تاريخية كبيرة النهارده أنا عمري بقه 27 سنة مش 24 سنة بس زي زمان
بعد التخرج أديت الخدمة الإلزامية فى الجيش المصري فى سلاح الدفاع الجوي
فى مكان ما أسمه " أبو صوير " جنب الإسماعيلية
والكلام ده كان من ناريخ 16/1/2008 وحتى 1/3/2009
عرفت فيها ناس كتير ومرت عليا ظروف وحكايات كتير أوى فاكر معظمها دلوقتي
أسماء ناس كتير ( عمر وإسلام وبرايز والصول عمرو فى مركز التدريب فى دهشور لا ميه ولا نور زي ما بيقولوا ) وبعدين ( موسى وإياد وعبد العليم وطارق ورامي والحكايات والعنبر وناصر وهيثم وعيسى وإياد ناس وصور وحكايات ومواقف ) ده غير رمضان فى الجيش ( محسن وحسام ومحمود وطلعت وشريف ) ناس متتنسيش بجد
أنا بس بكتب عشان منساش
أرشيف يعني
أصلي عارف نفسي بنسى بسرعه
ومن التاريخ ده يعني من 1/3/2009
وأنا بدور على شغل حاولت أرجع شغلي القديم قبل الجيش واللى أسترميت فيه فترة الجيش بشكل متطقع
فى شركة طابا للمقاولات شركة صغيرة صحيح لكن عرفت فيها ناس كويسين فعلا ( مهندس/ سعيد ، محمد عبد الواجد ، حسام مشرف الكهرباء اللى كان معايا ربنا يرجعه بالسلامة من السعودية ، عصام المحاسب , وأبو عمار فراش المكتب ) أيام أيام أيام
سامحوني على المسلسل التاريخي ده بس أهو أمر الله بقه
وفي اليوم الأول من شهر مايو لعام 2010 أشتغلت فى شركة حسن علام بتاعة المقاولات
واللى ميعرفش حسن علام شركة من شركات قطاع الأعمال ( حكومة يعني ) وتعتبر شركة كبيرة فى مصر والحمد لله أنا مبسوط فيها وبشتغل فيها لحد اللحظة دي
فاضل تاريخ مهم أوى
واللى هو ليه علاقة بعنوان الموضوع
السقوط فى الحب
24/12/2009
قابلت اللى غيرتني وغيرت وجهة نظري عن أن العزوبية كنز لا يفنى
أتشعلقت بيها أوى من أول مرة
وتوالت التواريخ المهمة
1/1/2010
22/1/2010
وغيرها
وصولا إلى 28/5/2010
وصولا إلى النهارده 4/9/2010 مهم اوى النهارده
أدعولي
